តំបន់អារ៉ែង ពួនសម្ងំយ៉ាងជ្រៅក្នុងដងបុព្ធតា ល្បីថាអាស្ចារ្យស្អាតខ្លាំងដូចក្នុងរឿងនិទាន

កោះកុង៖ ពួនសម្ងំយ៉ាងជ្រៅក្នុងដងបុព្ធតា ដងស្ទឹងអារ៉ែង បានរក្សាទុកនូវសក្ដានុពលទេសចរណ៍ដ៏វិសេសវិសាលមួយ ក្នុងស្រុកថ្មបាំង ខេត្តកោះកុង បានលាតសន្ធឹងកាត់ឃុំចំនួន ៣ តាមដងស្ទឹងអារ៉ែង មានចម្ងាយប្រមាណ​ ២៥គីឡូម៉ែត្រ​ពី​រង្វង់មូលស្រុកថ្មបាំង។ ហើយជាផ្នែកមួយនៃជ្រលងអារ៉ែង ដងស្ទឹងសម្ងាត់មួយនេះ ហ៊ុមព័ទ្ធដោយព្រៃត្រូពិច​ដ៏ខៀវស្រងាត់ ដែលជាជម្រកសត្វព្រៃ និងជីវៈចម្រុះដ៏​កម្រៗជាច្រើនប្រភេទ។

លោក សុខ ចាន់គ្រឹះស្នា ប្រធានមន្ទីរទេសចរណ៍ខេត្តកោះកុង បានប្រាប់ឱ្យដឹងនៅព្រឹកថ្ងៃទី២៥ ខែមករា ឆ្នាំ២០២១ នេះថានៅរដូវប្រាំង ទឹកស្ទឹងហូរបន្ទាបខ្លួន រំលេចនូវឆ្នេរខ្សាច់សក្បុសជាច្រើនកន្លែង គួរឲ្យចង់ដើរលម្ហែហើយ នៅលើឆ្នេរខ្សាច់ទាំងនោះ ភ្ញៀវទេសចរ​ក៏អាចបោះតង់កម្សាន្តបែបផ្សងព្រេងបានផងដែរ។ ហើយពយម្រេច​កង្កែប ជាគោលដៅទេសចរណ៍​ដ៏ពេញនិយម​ប្រចាំនៅតំបន់អារ៉ែង ដែលស្ថិតក្នុងស្រុកថ្មបាំង ខេត្តកោះកុង ដែលមានចម្ងាយជាង ៤គីឡូម៉ែត្រពីសាលាបឋមសិក្សាជំនាប់ ហើយអ្នកទេសចរត្រូវធ្វើដំណើរថ្មើជើងកាត់ព្រៃ ដែលមាន​ដើមឈើធំៗ និងជម្រាលភ្នំ ដោយចំណាយពេល ១ម៉ោង ៤០នាទី ទើបទៅដល់គោលដៅ។

លោក សុខ ចាន់គ្រឹះស្នា បន្ដទៀតថា ម្រេចកង្កែប ជាពយមួយនៃភ្នំម្រេចកង្កែប ដែលស្ថិតក្នុងភូមិសាស្រ្ដជួរភ្នំក្រវាញខាងត្បូង គ្របដណ្ដប់ដោយព្រៃទឹកភ្លៀង ដែលជាជម្រកនៃ​ពពួកសត្វព្រៃ និងជីវៈចម្រុះកម្រៗជាច្រើនប្រភេទ ដែលមើលទៅធៀបដូចជាឋានសួគ៍។ ហើយសេវាកម្មទេសចរណ៍នៅទីនេះ ត្រូវបានរៀបចំ​ដោយ​សហគមន៍ទេសចរណ៍តំបន់អារ៉ែង ព្រមទាំងមានចុងភៅចម្អិនម្ហូបអាហារក្នុងព្រៃ ជូនភ្ញៀវទេសចរ​ថែមទៀតផង។

គួរជម្រាបដែរថា សក្តានុពលទេសចរណ៍នៃពយម្រេចកង្កែប ពិតជាអន្ទងចិត្តអ្នកចូលចិត្តដើរព្រៃ។ ភាគច្រើន អ្នកទេសចរ​ដែលមកដល់ទីនេះ គឺនិយមបោះតង់ ឬគេងអង្រឹងក្រោមដើមឈើ ដើម្បីទទួលយកបទពិសោធន៍ និងបរិយាកាសបែបថ្មី៕

អត្ថបទ៖ ស្រេង ចំរើន