ទីតាំង ១៣កន្លែង ត្រូវបានអាជ្ញាធរខេត្តបន្ទាយមានជ័យ រៀបចំសម្រាប់យុទ្ធនាការចាក់វ៉ាក់សាំងការពារជំងឺកូវីដ-១៩ ជូនដល់ប្រជាពលរដ្ឋ និងមន្ត្រីរាជការ

បន្ទាយមានជ័យ៖ អភិបាលខេត្តបន្ទាយមានជ័យឯកឧត្តម អ៊ុំ រាត្រី និងជាប្រធានអនុគណៈកម្មការចំពោះ​កិច្ចចាក់វ៉ាក់សាំងការពារជំងឺកូវីដ-១៩ បានឱ្យដឹងនៅថ្ងៃទី៣១ ខែមីនា ឆ្នាំ២០២១នេះថា នៅខេត្តបន្ទាយមានជ័យអាជ្ញាធរខេត្ត បានរៀបចំទីតាំង ១៣កន្លែង និងក្រុមគ្រូពេទ្យ ១៣ក្រុម នៅតាមក្រុងស្រុកទាំង៩របស់ខេត្ត ដើម្បីយុទ្ធនាការចាក់វ៉ាកសាំងជូនដល់ប្រជាពល​​រដ្ឋ និងមន្ត្រីរាជការ​នោះ។

ក្នុងឱកាសចុះពិនិត្យមើលកន្លែងត្រៀមចាក់វ៉ាក់សាំងតាមបណ្តាស្រុកក្រុងកាលពីព្រឹកមិញនេះ ឯកឧត្តម អ៊ុំ រាត្រី បានបញ្ជាក់ថា ទីតាំងដែលបានរៀបចំហើយនោះ​មាននៅ ក្រុងសិរីសោភ័ណ ២ក្រុម ២ទីតាំង មន្ទីរពេទ្យបង្អែកក្រុង និងសាលាវិទ្យាល័យសិរីសោភ័ណ, ក្រុងប៉ោយប៉ែត ២ក្រុម ២ទីតាំង មន្ទីរពេទ្យបង្អែកក្រុង, ស្ថានីយរថភ្លើងក្រុងប៉ោយប៉ែត, ស្រុកព្រះនេត្រព្រះ ២ក្រុម ២ទីតាំង នៅមន្ទីរពេទ្យបង្អែកស្រុកព្រះនេត្រព្រះ, ស្រុកមង្គលបូរី ២ក្រុម ២ទីតាំង នៅមន្ទីរពេទ្យ មិត្តភាពកម្ពុជាជប៉ុនមង្គលបូរី, ការិយាល័យស្រុកប្រតិបត្តិ ស្រុកមង្គលបូរី និងបណ្តា៥ស្រុកផ្សេងៗទៀត១ក្រុម ១ទីតាំង នៅតាមមន្ទីរពេទ្យបង្អែកស្រុក។

ឯកឧត្តមបន្តទៀតថា ក្នុងថ្ងៃយុទ្ធនាការចាក់វ៉ាក់សាំងការពារជំងឺកូវីដ១៩នេះគឺចាក់ជូន ដល់មន្ត្រីរាជការដែលនៅសេសសល់ អាជ្ញាធរដែនដីមូលដ្ឋាន ប្រជាពលរដ្ឋប្រឈម ដូចជាអាជីវករ អ្នករត់តាក់ស៊ី ម៉ូតូឌុប និងប្រជាពលរដ្ឋទូទៅ។

ឯកឧត្តមអភិបាលខេត្តបន្ទាយមានជ័យ បានធ្វើការណែនាំដល់អាជ្ញាធរសមត្ថកិច្ច ពាក់ពន្ធក្រុងស្រុកត្រូវបន្តអប់រំផ្សព្វផ្សាយ ជូនដល់ប្រជាពលរដ្ឋឱ្យពួកគាត់ចុះឈ្មោះចាក់ វ៉ាក់សាំង ដោយស្ម័គ្រចិត្តនៅតាមក្រុងស្រុកបន្តទៀត។ មន្ទីរសុខាភិបាលខេត្តអាជ្ញាធរក្រុង ស្រុកត្រូវជួយសម្រួលបងប្អូនប្រជាពលរដ្ឋមកកាន់ទីតាំងចាក់វ៉ាក់សាំងឱ្យបានច្បាស់ ដែល យុទ្ធនាការចាក់វ៉ាក់សាំងនៅទូទាំងខេត្តនាពេលខាងមុខនេះ ឱ្យទទួលបានជោគជ័យទៅតាម ផែនការកំណត់ ។

ឯកឧត្ដម អ៊ុំ រាត្រី ក៏បានណែនាំដល់អាជ្ញាធរក្រុងស្រុកត្រូវរៀបចំបំពាក់ម៉ាស៊ីនបាញ់ថ្នាំ​សម្លាប់មេរោគ ម៉ាស៊ីនវ៉ាស់កំដៅ រក្សាគម្លាត សុវត្ថិភាពរៀបចំសណ្តាប់ធ្នាប់ ចៀសវាងការ ប្រជ្រៀតគ្នានាំឱ្យឆ្លងជំងឺកួវីដ-១៩។ ត្រូវអនុវត្តន៍តាមការណែនាំរបស់ រាជរដ្ឋាភិបាល ក៏ដូចក្រសួង​សុខាភិបាលនូវវិធានការ ៣.ការពារ និង ៣.កុំ ​ឱ្យខ្ជាប់ខ្ជួន៕

ប្រភព៖ ក្រសួងព័ត៌មាន