អង្ករដំណើបខ្មៅជាកំពូលអាហារប្រឆាំងជម្ងឺមហារីក

“អង្ករដំណើបខ្មៅ” ទទួលបានការនិយមចូលចិត្តយ៉ាងខ្លាំងនៅទ្វីបអាស៊ី ហើយឥឡូវនេះវានឹងជាកំពូលអាហារជួរមុខនៅទ្វីបអឺរ៉ុបផងដែរ។ ពួកអ្នកវិទ្យាសាស្ត្រអាមេរិកបានឱ្យដឹងថា ធញ្ញជាតិនេះមានបរិមាណស្ករទាប ប៉ុន្តែសម្បូរទៅដោយសារជាតិសរសៃដ៏មានប្រយោជន៍សម្រាប់សុខភាព និងមានសារជាតិរំញោចដែលអាចជួយប្រឆាំងតបនឹងជម្ងឺបេះដូង និងមហារីក នេះបើតាមពួកជំនាញការបញ្ជាក់ឱ្យដឹង។ពួកអ្នកវិទ្យាសាស្ត្រនៅមហាវិទ្យាល័យរដ្ឋល្វីស្យាណា បានវិភាគគំរូអង្កាមរបស់ដំណើបខ្មៅដាំនៅភាគខាងត្បូងប្រទេសអាមេរិក។ ពួកគេរកឃើញការកើនឡើងរបស់សារជាតិប្រឆាំងអុកស៊ីដរេដុកម្ម (anthocyanin)។ សារជាតិប្រឆាំងអុកស៊ីដរេដុកម្មនេះគឺជាមូលហេតុបង្កើតពណ៌ត្នោតខ្មៅរបស់បន្លែផ្លែឈើច្រើនប្រភេទ។ វាក៏បង្កើតពណ៌ក្រម៉ៅឱ្យអង្ករដំណើបខ្មៅផងដែរ។ការស្រាវជ្រាវបង្ហាញថា សារជាតិប្រឆាំងអុកស៊ីដរេដុកម្មបង្កើតពណ៌ក្រម៉ៅនេះនឹង បោសសម្អាតពពួកម៉ូលេគុលដែលបង្កគ្រោះថ្នាក់ និងជួយការពារសរសៃឈាម ព្រមទាំងទប់ស្កាត់របួសដែលអាចនាំអោយកើតជម្ងឺមហារីក ។

មុននេះរាប់សតវត្សរ៍មកហើយ អង្ករដំណើបខ្មៅត្រូវបានចាត់ទុកជាអាហារខ្ពង់ខ្ពស់ដែលមានតែស្ដេចប៉ុណ្ណោះទើបអាចបរិភោគបាន។ បច្ចុប្បន្ននេះអង្ករដំណើបខ្មៅជាប្រភពអាហារសំខាន់ក្នុងការស្រស់ស្រូបរបស់ប្រជាជនទ្វីបអាស៊ី ក្នុងម្ហូបជាលក្ខណៈ Sushi និងបង្អែមលាងមាត់។

អង្ករដំណើបខ្មៅសម្បូរវីតាមីនជាងអង្ករដំណើបស ព្រោះវាមានបរិមាណវីតាមីន E និងពពួកសារជាតិប្រឆាំងអុកស៊ីដរេដុកម្មខ្ពស់ជាង។

ពួកអ្នកវិទ្យាសាស្ត្រក៏ទូន្មានផងដែរថា គួរប្រើប្រាស់អង្ករដំណើបខ្មៅធ្វើជាសារជាតិបង្កើតពណ៌អាហារ ដោយវាមានលក្ខណៈធម្មជាតិផង និងល្អចំពោះសុខភាពផង។ តាមការស្រាវជ្រាវជាច្រើនបានឱ្យឃើញថា សារជាតិបង្កើតពណ៌មួយចំនួនរួមចំណែកបង្កជាជម្ងឺមហារីក និងបញ្ហាពាក់ព័ន្ធដល់សុខភាពរបស់កុមារថែមទៀតផង៕

ដោយ៖ អាពេជ្រ