អភិបាលខេត្តបាត់ដំបង បានជំរុញទៅសមត្ថកិច្ចតាមច្រកព្រំដែនកម្ពុជា ថៃ សម្រួលឯកសារ ការពិនិត្យសុខភាឲ្យបានត្រឹមត្រូវ

ក្នុងឱកាសដឹកនាំកិច្ចប្រជុំ ពិភាក្សាការងារស្តីពីការគ្រប់គ្រង និងការពិនិត្យសម្រួលដល់ដំណើររបស់ពលករខ្មែរត្រឡប់មកពីថៃ និងការធ្វើចត្តាឡីស័ក ចំពោះពលករទើបត្រឡប់មកពីប្រទេសថៃ នេះដែរ នៅថ្ងៃទី២៣ ខែធ្នូ ឆ្នាំ២០២០ ឯកឧត្តម ងួន រតនៈ អភិបាលខេត្តបាត់ដំបង បានជំរុញទៅសមត្ថកិច្ចតាមច្រកព្រំដែនកម្ពុជា និងថៃ ដែលជាប់នឹងខេត្តបាត់ដំបង និងមន្ត្រីសុខាភិបាល ក្នុងការសម្រួលឯកសារ ការពិនិត្យសុខភាព ការយកសំណាកឲ្យបានត្រឹមត្រូវ និងការធ្វើចត្តាឡីស័កដល់ពលករ តាមការណែនាំរបស់សម្ដេចតេជោនាយករដ្ឋមន្ត្រី និងក្រសួងសុខាភិបាល ។ ឯកឧត្តម បានសង្កត់ធ្ងន់ថា ការធ្វើចត្តាឡីស័កលើពលករនេះ មិនត្រូវមានការលើកលែង និងអនុញ្ញាតឲ្យទៅផ្ទះ ទោះក្នុងករណីណាក៏ដោយ ចៀសវាងមានការថ្លោះថ្លូយ ហើយបង្ការភ័យព្រួយបារម្ភដល់ពលរដ្ឋផ្សេងទៀត ហើយក៏សូមថ្លែងអំណរគុណដល់សមត្ថកិច្ច អាជ្ញាធរ មន្ទីរជំនាញ ដែលកំពុងខិតខំជួយក្នុងការងារនេះ ។បើតាមលោក សឿម ប៊ុនរិទ្ធ អភិបាលរង និងជាអ្នកនាំពាក្យរដ្ឋបាលខេត្តបាត់ដំបង បានឲ្យដឹងថា បន្ទាប់ពីមានការផ្ទុះឆ្លងជំងឺកូវីដ១៩ នៅខេត្តសាមុទសាខន នៃប្រទេសថៃ ជាច្រើនករណី ដោយគិតចាប់ពីថ្ងៃទី២១ និង២២ ខែធ្នូ ឆ្នាំ២០២០ មានពលករខ្មែរត្រឡប់មកពីថៃ តាមច្រកព្រំដែនជាប់នឹងខេត្តបាត់ដំបង ត្រូវបានអាជ្ញាធរខេត្ត និងមន្ត្រីជំនាញបានពិនិត្យសុខភាព និងបានធ្វើចត្តាឡីស័កពលករសរុបចំនួន ១២១នាក់ នៅមណ្ឌលចំនួន២ ក្នុងស្រុកកំរៀង មណ្ឌលចត្តាឡីស័ក វិទ្យាល័យកំរៀង ស្ថិតក្នុងឃុំអូរដា និងមណ្ឌលសុខភាពត្រាង ស្ថិតក្នុងឃុំត្រាង ស្រុកំរៀង ខេត្តបាត់ដំបង ។

ស្ថិតនាឪកាសនេះដែរ ឯកឧត្តម ងួន រតន: អភិបាលខេត្ត បានដឹកនាំក្រុមការងារពិនិត្យការត្រួតពិនិត្យមើលពលករចំណាកស្រុក ដែលទើបពីប្រទេសថៃ ក្នុងមណ្ឌលចត្តាឡីស័ក វិទ្យាល័យកំរៀង និងបន្តចុះពិនិត្យមើលស្ថានភាព នៅតាមច្រកទ្វារព្រំដែនអន្តរជាតិដូង ឋិតក្នុងឃុំបឹងរាំង និងច្រកទ្វារព្រំដន សួនស៊ុ ( អូរអន្លក់ ) ឋិតក្នុងឃុំតាសែន ស្រុកកំរៀង ខេត្តបាត់ដំបង ផងដែរ ៕

ដោយ៖ បូ​ សល់