(BBC)៖ ក្រុមហ៊ុន Cairn Energy ដែលជាក្រុមហ៊ុមថាមពលមួយមានមូលដ្ឋាននៅចក្រភពអង់គ្លេសត្រូវបានតុលាការអន្តរជាតិកាត់ក្តីឱ្យទទួលបានសំណងការខូចខាតចំនួន ១២០០ លានដុល្លារ ក្នុងជម្លោះដ៏លេចធ្លោមួយជាមួយរដ្ឋាភិបាលឥណ្ឌាកាលពីខាងមុន ។ នេះបើយោងតាមការចុះផ្សាយរបស់BBC នៅថ្ងៃទី ២៨ ខែមករា ឆ្នាំ ២០២១ ។
ក្រុមហ៊ុន Cairn បានចាប់ផ្តើមធ្វើការកំណត់ហើយថាទ្រព្យសម្បត្តិណាខ្លះដែលខ្លួនអាចនឹងរឹបអូស ប្រសិនបើរដ្ឋាភិបាលឥណ្ឌាមិនព្រមគោរពតាមបទបញ្ជានេះទេ ។
តាមប្រភពខ្លះបានឱ្យដឹងថា ក្រុមហ៊ុននឹងអាចរឹបអូសយកយន្តហោះ និងកប៉ាល់ និងទ្រព្យសម្បត្តិដទៃទៀតរបស់រដ្ឋាភិបាលឥណ្ឌា ។
ករណីនេះត្រូវបានដាក់ប្តឹងទៅតុលាការ បន្ទាប់មន្រ្តីពន្ធលើប្រាក់ចំណូលបានកាន់កាប់ភាគហ៊ុន ១០%របស់ក្រុមហ៊ុនChairn នៅក្នុងក្រុមហ៊ុនបុត្រសម្ព័ន្ធរបស់ខ្លួននៅឥណ្ឌា ។
កាលពីខែធ្នូ ឆ្នាំ ២០២០ កន្លងទៅនេះ សាលាក្តីបានសម្រេចជាឯកច្ឆ័ន្ទថា រដ្ឋាភិបាលក្រុងដេលីបានរំលោភលើសន្ធិសញ្ញាវិនិយោគទ្វេភាគីអង់គ្លេស-ឥណ្ឌា ឆ្នាំ២០១៤ ។ សាលាក្តីបានតម្រូវឱ្យក្រុងដេលីបង់ប្រាក់ចំនួន ១២០០ លានដុល្លារជាសំណងក្នុងការខូចខាត រូមទាំងការប្រាក់ និងថ្លៃដើមដើម្បីទូទាត់សងក្រុមហ៊ុន Chairn សម្រាប់ភាគហ៊ុន និងភាគលាភដែលត្រូវបានរឹបអួសយក ។
ប៉ុន្តែចាប់តាំងពីសាលាក្តីចេញសេចក្តីសម្រេចកម្រាស់ ៥៨២ ទំព័រមក រដ្ឋាភិបាលឥណ្ឌារបស់លោកនាយករដ្ឋមន្រ្តី Narendra Modi មិនបានបង្ហាញថាខ្លួនមានបំណងគោរពតាមសាលក្រមនេះទេ ទោះបីដល់ពេលកំណត់ឱ្យសងប្រាក់ក៏ដោយ ។
ក្រុមហ៊ុន Chairnបានផ្ញើសំបុត្រមួយទៅមន្រ្តីរដ្ឋាភិបាលឥណ្ឌាដោយអះអាងថា ម្ចាស់ភាគហ៊ុនជាច្រើនរំពឹងថានឹងមានដំណោះស្រាយក្នុងពេលឆាប់ៗ ។
សំបុត្រនោះបានបន្ថែមថា “ប្រាក់សំណងនោះនឹងត្រូវបានអនុវត្តប្រឆាំងនឹងទ្រព្យសម្បត្តិរបស់រដ្ឋាភិបាលឥណ្ឌាក្នុងយុត្តាធិការជាច្រើនជុំវិញពិភពលោក ។”
ទោះបីជាលិខិតនោះមិនបញ្ជាក់ច្បាស់ថា ពេលណាទើបគេនឹងរឹបអូសទ្រព្យសម្បត្តិទាំងនោះ តែវាបានបញ្ជាក់ថាគោលដៅដែលនឹងត្រូវរឹបអូសមានដូចជាសហគ្រាសដែលគ្រប់គ្រងដោយសហគ្រាសសាធារណៈដូចជាក្រុមហ៊ុន Air India របស់រដ្ឋជាដើម ។
ដោយ៖ បូ សល់