មូលហេតុនៃជំងឺផ្លូវចិត្តដែលអ្នកគួរយកចិត្តទុកដាក់

មនុស្សគ្រប់រូបក្រៅពីមានវិបត្តិក្នុងចិត្ត ឬផ្លូវកាយ នៅមានវិបត្តិជាច្រើន​ទៀត ដែល​កើតចេញពី​ផ្លូវចិត្ត​របស់ខ្លួន​សុទ្ធ តាមការសិក្សាស្រាវជ្រាវរបស់អង្គការសុខភាពពិភពលោក បានអោយដឹងថាមាន​មូលហេតុធំៗចំនួន ៣ដែល​ធ្វើ​ឲ្យ​មនុស្ស​កើត​ជំងឺផ្លូវចិត្ត តើអ្វីទៅជាកត្តាជះឥទ្ធិពលធ្ងន់ធ្ងរទៅលើផ្លូវចិត្ត?១. កត្តាចិត្ត-សង្គម៖ បញ្ហាសង្គម៖ ការតានតឹងចិត្តនៅកន្លែងធ្វើការ ការស្លាប់នៃមនុស្សជាទីស្រឡាញ់ អំពើហិង្សាក្នុងគ្រួសារ ភាពអត់ការងារធ្វើ ភាពក្រីក្រតោកយ៉ាកជាដើម។ ការប៉ះទង្គិចផ្លូវចិត្តដែលបង្ករឡើងដោយមនុស្សមានដូចជា ការរំលោភផ្លូវភេទ ការកាប់សំលាប់ ការធ្វើទារុណកម្ម -ល- អាកប្បកិរិយាមិនល្អ កូនរៀនពីឳពុកម្តាយ និងធ្វើតាមអាកប្បកិរិយារបស់ពួកគាត់ ដូច្នេះហើយឳពុកម្តាយដែលមានជំងឺផ្លូវចិត្តអាចចំលងបញ្ហាផ្លូវចិត្តរបស់ខ្លួនទៅកូនបាន។ ការប្រើប្រាស់គ្រឿងញៀន (ឧទាហរណ៍ការផឹកស្រា ការប្រើយ៉ាម៉ា ហេរ៉ូអ៊ីន) ដែលជាគ្រឿងញៀនអាចបណ្តាលអោយមានជំងឺផ្លូវចិត្តផ្សេងៗដែលយើងមាននៅក្នុងចំណោមក្មេងជំទង់ និងមនុស្សពេញវ័យជាច្រើននៅក្នុងប្រទេសកម្ពុជា។២. កត្តាជីវសាស្រ្ត៖ របួសដែលបណ្តាលអោយមានការខូចខាតដល់ខួរក្បាល ជំងឺគ្រុនចាញ់នៅខួរក្បាល ភាពស្លេកស្លាំងធ្ងន់ធ្ងរ និងការខ្វះអាហារូបត្ថម្ភ ការខូចទ្រង់ទ្រាយពីកំណើត ការមានវ័យចំណាស់អាចប៉ះពាល់ដល់ខួរក្បាល (ជំងឺ Alzheimer)។៣. កត្តាបរិយាកាស៖ គ្រោះធម្មជាតិ គ្រោះទឹកជំនន់ ការរញ្ជួយផែនដី គ្រោះរាំងស្ងួត ការផ្ទុះភ្នំភ្លើង អ្នកជំងឺផ្លូវចិត្តខ្លះមានកំរិតស្រាល ខ្លះមានកំរិតធ្ងន់ ហើយខ្លះទៀតក្លាយជារ៉ាំរៃ និងមានផលវិបាកជាច្រើន។ ជំងឺផ្លូវចិត្តខ្លះមានរយៈពេលខ្លី ខ្លះទៀតមានរយៈពេលដ៏វែង។ ជំងឺផ្លូវចិត្តខ្លះស្តែងចេញដោយការក្រៀមក្រំ ខ្លះស្តែងចេញដោយអំពើហិង្សា ឬដោយអាកប្បកិរិយាកាចសាហាវ និងខ្លះទៀតធ្វើអោយអ្នកជំងឺមានភាពស្ងៀមស្ងាត់ និងមិនរវល់នឹងគេឯង។

ដោយ៖ សុខឃីម