អភិបាលខេត្តកំពង់ឆ្នាំងប្រគល់ដីដល់មន្ទីរចំនួន៣សម្រាប់សង់អគាររដ្ឋបាល

កំពង់ឆ្នាំង ៖ ដីសម្រាប់សង់អគារដ្ឋបាលមន្ទីរចំនួន៣អង្គភាព ត្រូវបានឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំងនិង លោកជំទាវ ប្រគល់ជូនដល់ថ្នាក់ដឹកនាំមន្ទីរ ដើម្បីរៀបចំដំណើរការសាងសង់អគាររដ្ឋបាល ។ ពិធីប្រគល់នេះធ្វើឡើងកាលពីរសៀលថ្ងៃទី២ ខែធ្នូ ឆ្នាំ២០២០ក្រោមអធិបតីភាពឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង និង លោកជំទាវ ព្រមទាំងមានការចូលរួមពីសំណាក់លោក លោកស្រី ថ្នាក់ដឹកនាំមន្ទីរអង្គភាពជុំវិញខេត្តផងដែរ ។

ពិធីប្រគល់ដីនេះគឺ បានរៀបចំធ្វើពិធីក្រុងពលីសុំសេចក្តីសុខ សេចក្តីចម្រើន សិរីមង្គល បវរសួរស្តី ពីម្ចាស់ទឹក ម្ចាស់ដីភូមិករ ដែលថែរក្សាបីបាច់នៅតំបន់នេះ ឲ្យជួយប្រោះព្រហ្មសុំពរជ័យអភិបាលថែរក្សាឲ្យមានសេចក្តីសុខតរៀងទៅ ។ ព្រមទាំងបាននិមន្តព្រះសិរីធម្មញាណសុខថាន ព្រះ មេគណខេត្តកំពង់ឆ្នាំង និង មន្រ្តីសង្ឃ ចម្រើនពុទ្ធិជ័យមង្គលនិងសម្តែងទេសនាផងដែរ ។

ឯកឧត្តមឈួរ ច័ន្ទឌឿន អភិបាលខេត្តកំពង់ឆ្នាំង បានមានប្រសាសន៍បញ្ជាក់ថា ដីដែលបានផ្តល់ជូនដល់មន្ទីរអង្គភាពទំាង៣នេះ មានមន្ទីរទំនាក់ទំនងរដ្ឋសភា ព្រឹទ្ធសភា និង អធិការកិច្ច  ។ មន្ទីរមុខងារ សធារណៈ និង មន្ទីរការងារបណ្តុះបណ្តាលវិជ្ជាជីវៈខេត្តកំពង់ឆ្នាំង ដែលបច្ចុប្បន្ន មន្ទីរទាំងនេះ ពុំមានអគារនិងដីផ្ទាល់នោះទេ ដោយជួលអគារឯកជនសម្រាប់ធ្វើការងារ ។

ឯកឧត្តមបានបញ្ជាក់ថា ដោយមើលឃើញនូវការលំបាកទាំងនេះ ក្នុងនាមថ្នាក់ដឹកនាំខេត្ត បានសម្រេចទិញដីចំនួន៣ប្លង់នេះ ដើម្បីផ្តល់ជូនដល់មន្ទីរទាំង៣អង្គភាពនេះ សម្រាប់ធ្វើការសាងសង់អគារដ្ឋបាលរបស់ខ្លួន ក្នុងការបំពេញភារកិច្ចក្នុងការបម្រើសេវាធារណៈរបស់ជូនប្រជាពលរដ្ឋ ។

ដីទាំងបីប្លង់នេះដែលប្រគល់ជូនដល់អង្គភាពទាំង៣នេះ គឺស្ថិតនៅជាប់និងដីតំបន់អភិវឌ្ឋន៍ថ្មីរបស់ខេត្ត ក្នុងភូមិសាស្រ្តសង្កាត់ខ្សាម ក្រុងកំពង់ឆ្នាំង ក្បែរង្វង់មូលទូកមាស ៕

ដោយ៖​ បូ សល់