លោកជំទាវវេជ្ជបណ្ឌិត ឱ វណ្ណឌីន៖ បុគ្គលមួយចំនួនតូចនៅតែមើលស្រាលករណីចម្លងវីរុសកូវីដ-១៩ ហេតុដូច្នេះហើយរាជរដ្ឋាភិបាលមានតែប្រើប្រាស់វិធានការផ្លូវច្បាប់

ភ្នំពេញ៖ ដោយសារតែបុគ្គលមួយចំនួននៅតែមិនខ្លាច ហើយនៅតែគិតថាការជួបជុំរបស់ពួកគាត់គឺសំខាន់ជាងការឆ្លងវីរុសកូវីដ-១៩ រាជរដ្ឋាភិបាលមានតែប្រើប្រាស់អាវុធចុងក្រោយ គឺវិធានការផ្លូវច្បាប់ ជម្រើសនេះដោយសារតែការអំពាវនាវរបស់សម្តេចប្រមុខរាជរដ្ឋាភិបាល ក៏ដូចជាក្រសួងសុខាភិបាល និងអាជ្ញាធរដែនដី នៅតែមានបុគ្គលមួយចំនួនតូច មិនគោរព និងអនុវត្តតាម។ នេះបើតាមការឱ្យដឹង ពីលោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាលនាព្រឹកថ្ងៃទី១៥ ខែមីនា ឆ្នាំ២០២១ ក្នុងសន្និសីទសារព័ត៌មានស្តីពី «ច្បាប់ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត»។

ឆ្លើយតបទៅនឹងសំណួរ របស់អ្នកសារព័ត៌មានដែលបានសួរថា តើធ្វើយ៉ាងណាទើបអាចកាត់ផ្តាច់ការចម្លងវីរុសកូវីដ-១៩ ដែលពាក់ព័ន្ធនឹងព្រឹត្តិការណ៍សហគមន៍ ២០កុម្ភៈបាន? លោកជំទាវវេជ្ជបណ្ឌិត បានសង្កត់ធ្ងន់ និងរម្លឹកថា ៖ “ ក្រោយពីហេតុការណ៍ថ្ងៃទី១៩ ខែកុម្ភៈ យើងរកឃើញ ៣១ករណី ហើយក៏មានការរកឃើញជាបន្តបន្ទាប់ទៀត រហូតដល់ ថ្ងៃទី២៤ ខែកុម្ភៈ យើងបានរកឃើញរហូតដល់ ៦៥ករណី ហើយបើយើងក្រលេកមើលក្នុងចន្លោះពីថ្ងៃទី១៩ ដល់ ថ្ងៃទី២៤ គឺថាប្រជាពលរដ្ឋនៅតែធ្វើចរាចរណ៍សកម្មជាទីបំផុត បើទោះជាមានការអំពាវនាវក៏ដោយ ក៏ការបន្ថយនូវការចល័តនានា គឺបងប្អូនប្រជាពលរដ្ឋយើងមិនបានធ្វើនោះទេ។ អ្នកដែលទៅហាងផ្សេងៗនៅតែសម្រុកទៅ អ្នកដែលជួបជុំគ្នានៅតែបន្តជួបជុំគ្នា អ្នករៀបចំពិធីនានានៅតែធ្វើមិនដឹង…។ ខ្ញុំសូមបន្ថែមថា បន្ទាប់ពីហេតុការណ៍ ៦៥ករណីនេះ សម្តេចប្រមុខរាជរដ្ឋាភិបាល បានអំពាវនាវដ៏ទទូចដោយសូមឱ្យប្រជាពលរដ្ឋនៅផ្ទះ កាត់បន្ថយនូវការចល័ត ។ល។ ហើយបន្ទាប់ពីមានការរាលដាលដល់ខេត្តមួយចំនួន ក៏មានការបិទការចរាចរណ៍មនុស្សចេញ-ចូល ដែលធ្វើឱ្យករណីឆ្លងបានធ្លាក់ចុះជាបន្តបន្ទាប់ ប៉ុន្តែក៏ចាប់ផ្តើមកើនឡើងវិញ នេះក៏ដោយសារតែបុគ្គលមួយចំនួន នូវតែមានទស្សនៈថា ‘មិនអីទេ’ ដែលទស្សនៈនេះហើយគឺជាមូលហេតុចំបងនៃការចម្លងវីរុសកូវីដ-១៩ ពីមនុស្សម្នាក់ទៅមនុស្សម្នាក់មានការកើនឡើង”។

លោកជំទាវក៏បានបន្ថែមផងដែរថា រហូតដល់ថ្ងៃទី០៨ និងថ្ងៃទី០៩ ខែមីនា ករណីចាប់ផ្តើមកើនឡើងវិញ ហេតុដូច្នេះហើយ សម្តេចតេជោ ហ៊ុន សែន ក៏ដូចជាក្រសួងសុខាភិបាល បានធ្វើការអំពាវនាវជាថ្មីទៀត ប៉ុន្តែបុគ្គលមួយចំនួនតូចនៅតែមើលស្រាលហានិភ័យនៃការចម្លង ប៉ុន្តែទោះជាយ៉ាងនេះក៏ដោយ ក៏សម្តេចប្រមុខរាជរដ្ឋាភិបាល បានណែនាំក្រសួងពាក់ព័ន្ធត្រូវធ្វើការអប់រំ ណែនាំ ដើម្បីចៀសវាងនូវការប្រើវិធានការផ្លូវច្បាប់។ លោកជំទាវបានបញ្ជាក់បន្ថែមថា ៖ “ការអប់រំ ការណែនាំ ហាក់ដូចជាពុំត្រូវបានយកចិត្តទុកដាក់ ហើយការកាត់ផ្តាច់ការចម្លងវីរុសកូវីដ-១៩នៅពេលនេះ គឺមិនអាចទៅរួចទេ ព្រោះពួកគាត់មិនខ្លាច ពួកគាត់នៅតែគិតថាការជួបជុំរបស់ពួកគាត់មានសារៈសំខាន់ជាងការឆ្លងវីរុសកូវីដ-១៩។ ពួកគាត់មិនបានថ្លឹងថ្លែងពីហានិភ័យ នៃការចម្លងវីរុសនេះខ្ពស់ នៅពេលដែលពួកគាត់ជួបជុំគ្នា ប៉ុន្តែបែរជាគិតថា ការជួបជុំរបស់ពួកគាត់ ការរៀបចំពិធីរបស់ពួកគាត់ជាដើម គឺសំខាន់ជាងការឆ្លងវីរុសកូវីដ-១៩”។

ដោយមើលឃើញពីការចម្លងនៅតែមាន ការអំពាវនាវនៅតែបន្ត ប៉ុន្តែការគោរពហាក់ដូចជាមិនទាំងអស់គ្នា ទើបច្បាប់ ក៏ដូចជា អនុក្រឹត្យ ស្តីពីវិធានការទប់ស្កាត់ការឆ្លងរាលដាលជំងឺកូវីដ-១៩ និងជំងឺឆ្លងកាចសាហាវ និងប្រកបដោយគ្រោះថ្នាក់ធ្ងន់ធ្ងរផ្សេងទៀត ត្រូវបានធ្វើឡើងដោយប្រញ៉ាប់ ដើម្បីទប់ទល់ការរីករាលដាលវីរុសនេះ ដោយមានទាំងការផាកពិន័យ និងដាក់ទោសទណ្ឌផងដែរ។

គួររម្លឹកដែលថា គិតត្រឹមព្រឹកថ្ងៃទី១៥ ខែមីនា ឆ្នាំ២០២១នេះ កម្ពុជាបន្តរកឃើញករណីឆ្លងវីរុសកូវីដ-១៩ ថ្មី ចំនួន២០នាក់ ប៉ុន្តែមានករណីជាសះស្បើយថ្មីរហូតដល់ ៨៣នាក់ ហើយរាល់ករណីជាសះស្បើយ ក៏ដូចជាករណីវិជ្ជមានថ្មី ស្ទើរតែទាំងអស់ គឺជាប់ពាក់ព័ន្ធនឹងព្រឹត្តិការណ៍សហគមន៍ ២០កុម្ភៈ៕

ប្រភព៖ក្រសួងព័ត៌មាន