សម្តេចផ្តល់ស្រូវពូជសម្រាប់ដាំដុះឡើងវិញទាន់ពេលវេលាគឺស្មើនឹងការស្តារទាំងជីវភាពនិងស្តារក្តីសង្ឃឹមរបស់ប្រជាពលរដ្ឋឡើងវិញ

នៅចំពោះមុខ ឯ្ឧត្តមទេសរដ្ឋមន្ត្រី គន់ គីម និងមន្ត្រីជាន់ខ្ពស់ក្រសួងកសិកម្មលោកស្រី   ហើយ ហម អាយុ៥០ឆ្នាំ  រស់នៅភូមិ សំបុកអក ឃុំកំពង់ព្រៀង ស្រុកសង្កែ ខេត្តបាត់ដំបងបានថ្លែងថា ” ខ្ញុំត្រេកអរខ្លាំងណាស់ពេលលឺដំណឹងថា សម្តេចនឹងផ្តល់ពូជស្រូវសម្រាប់ខ្ញុំ និងអ្នកភូមិខ្ញុំបានដាំដុះឡើងវិញភ្លាមៗពេលទឹកកំពុងចាប់ស្រកទៅវិញ…ខ្ញុំលឺដំណឹងនេះចំពេលក្តីសង្ឃឹមរបស់ខ្ញុំបានបាត់បង់អស់ទៅតាមស្រែខ្ញុំជាង២ហិចតាដែលរលួយខ្ទេចដោយសារទឹកជំនន់…ការផ្តល់ពូជស្រូវភ្លាមៗពេលទឹកកំពុងស្រកបណ្តើៗនេះ ជាការស្តារក្តីសង្ឃឹម ខ្ញុំនិងអ្នកភូមិខ្ញុំរាប់រយគ្រួសារឡើងវិញ” ។ ការថ្លែងបែបនេះធ្វើឡើងនៅព្រឹកថ្ងៃទី២១ ខែវិច្ឆិកា ខណ: ឯកឧត្តមទេសរដ្ឋមន្ត្រីគន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ តំណាងដ៏ខ្ពង់ខ្ពស់ របស់សម្តេចតេជោ ហ៊ុន សែន  អមដំណើរដោយមន្រ្តីជាន់ខ្ពស់ពីក្រសួង កសិកម្ម និងមន្រ្តីលេខាធិការដ្ឋានគណ:កម្មាធិការគ្រប់គ្រងគ្រោះមហន្តរាយខេត្តបាត់ដំបងនិងបន្ទាយមាន ជ័យ បានចុះពិនិត្យជាក់ស្តែងការដាំដុះ និងបង្ក បង្កើនផលឡើងវិញរបស់ប្រជាពលរដ្ឋ នៅ ភូមិ សំបុកអក ឃុំ កំពង់ព្រៀង ស្រុក សង្កែ ខេត្តបាត់ដំបង  និងភូមិបឹងតូច ឃុំសឿ ស្រុកមង្គលបុរី ខេត្ត បន្ទាយមានជ័យ។ទេសរដ្ឋមន្ត្រីបាន លើកទឹកចិត្ត និងណែនាំដល់មន្ទីជំនាញ បន្តជួយជាបច្ចេកទេសដល់ប្រជាពលរដ្ឋក្នុងការស្តារជីវភាពឡើងវិញ រួមទាំងការអនុវត្តនយោបាយរក្សាទឹកទុកប្រើប្រាស់ ដែលជាបទបញ្ជាដ៏ខ្ពង់ខ្ពស់របស់សម្តេច តេជោ។ ការងារនេះក៏ចាំបាច់ត្រូវរៀបចំជាប្រតិទិននៃការដាំដុះនិងប្រើប្រាស់ទឹកឱ្យបានអស់លទ្ធភាព ដោយត្រូវចងក្រងជាសហគមន៍កសិករឱ្យបានរឹងមាំផងដែរ។

គួរបញ្ជាក់ថា ការងារស្តារឡើងវិញបានលទ្ធផលប្រមាណជាង៥០% ក្នុងនោះ ខេត្តបាត់ដំបងបាន ៥,៨៣១ហិចតា លើផ្ទៃដីដែលអាចស្តារឡើងវិញបានចំនួន ១០,៥០០ហិចតា។ នៅខេត្តបន្ទាយមានជ័យ បាន ៥,១១៣ ហិចតាលើផ្ទៃដីខូចខាតសរុបដែលអាចស្តារឡើងវិញបានចំនួន ១១,១៦៩ ហិចតា  ហើយអាជ្ញាធរនិងប្រជាពលរដ្ឋកំពុងបន្តកិច្ចការនេះបន្ថែមតាមផែនការ។

ដោយ៖ បូ សល់