រមណីយដ្ឋានកោះតាឃួន កំពុងអង្រួនចិត្តភ្ញៀវទេសចរនារដូងប្រាំង

ស្ទឹងត្រែង៖ ភ្ញៀវទេសចរជាច្រើន បានសរសើរមិនដាច់ពីមាត់ ពីសម្រស់ដ៏ស្រស់ត្រកាលរបស់កោះតាឃួន ដែលកំពុងបង្អួតខ្លួន លើទឹកដីខេត្តស្ទឹងត្រែង ក្នុរដូវប្រាំងនេះ ។ រមណីយដ្ឋានកោះតាឃួន មានឆ្នេរខ្សាច់សក្បុស លាតសន្ធឹងល្វឹងល្វើយគួរជាទីគយគន់ ហ៊ុំព័ទ្ធទៅដោយដើមជ្រៃតូចៗ ដុះពូតផ្តុំម្តុំៗ បានផ្តល់ម្លប់ត្រជាក់ល្ហឹម ដែលអាចបោះតង់ ឬ រៀបចំកម្មវិធីនានាបានយ៉ាងមានផាសុកភាព និងសប្បាយរីករាយ។

លោក អ៊ន់ ប៉ោសឿន ប្រធានមន្ទីរទេសចរណ៍ខេត្តស្ទឹងត្រែង បានមានប្រសាសន៍ឱ្យដឹងថា ភ្ញៀវទេសចរដែលមកកម្សាន្តក្នុងកោះតាឃួននារដូវប្រាំងនេះ នឹងបានទស្សនាវាលខ្សាច់យ៉ាងសក្បុស មានរាងជាថ្នាក់ៗ រួមជាមួយរុក្ខជាតិតូចៗដុះចម្រុះពណ៌ ជាម្លប់ដ៏ត្រជាក់សម្រាប់បោះតង់ស្នាក់នៅ តាមកោះឬ វាលខ្សាច់ដែលផុសចេញនៅក្នុងរដូវទឹកសម្រកនេះ ។ ពិសេសមានផ្ទៃទឹកទន្លេ បានរំលេចពណ៌ខៀវស្រងាត់ ហើយហូរតិចៗ តាមជ្រលងដងអូរ បង្កលក្ខណៈងាយស្រួលសម្រាប់ភ្ញៀវទេសចរ ងូតទឹកលេងបានយ៉ាងសប្បាយនៅលើកោះនោះ។ លោកប្រធានមន្ទីរបានបញ្ជាក់ថា ក្រៅពីនេះភ្ញៀវទេសចរ អាចមើលថ្ងៃរះនៅពេលព្រលឹម និងថ្ងៃលិចនៅពេលល្ងាចក្រោមពន្លឺរស្មីក្រហមព្រឿងៗ យ៉ាងស្រស់ស្រទន់ មិនចាញ់ទេសភាពនាមាត់សមុទ្រនោះឡើយ។

លើសពីនោះ ភ្ញៀវអាចជិះទូកមើលសត្វស្លាប មើលទឹក និង រុក្ខជាតិចម្រុះជាច្រើនប្រដេញគ្នា រេរាំបក់បោកតាមផ្ទៃទឹកផងដែរ។ លោកបន្តថា កោះនេះមានទំហំទទឹងប្រហែល ៧០ ម៉ែត្រ និងបណ្តោយ ១០០ ម៉ែត្រ អ្នកទេសចរ អាចប្រើមធ្យោបាយទៅមកបាន តាមឡាន ម៉ូតូ និងកាណូតបានយ៉ាងងាយស្រួល។

«កោះតាឃួនវាស្ថិតនៅក្នុងតំបន់សហគមន៍អេកូទេសចរណ៍សម្រស់កោះហានចឹងដោយសារវាក៏ជាផ្នែកមួយនៅក្នុងតំបន់រ៉ាមសារចឹងកោះហ្នឹងវាមានផុសខ្សាច់ចេញស្អាតនៅក្នុងរដូវប្រាំងនេះ។ហើយមានលក្ខណៈអំណោយផលល្អសម្រាប់ភ្ញៀវទេសចរមកសម្រាកនិងស្នាក់នៅបោះតង់និងលេងកម្សាន្តនៅវាលខ្សាច់ទឹកសាបនិយាយរួមគឺជាសមុទ្រទឹកសាបក្នុងតំបន់រ៉ាមសារ»។

លោក អ៊ន់ ប៉ោសឿន បានបញ្ជាក់ថា មន្ទីរក៏មានការរៀបចំ សេវាកម្មដឹកភ្ញៀវកម្សាន្តតាមទូក និងបម្រើ សេវាម្ហូបអាហារនៅក្នុងសហគមន៍ ព្រមទាំងធានាបាននូវសន្តិសុខ ជូនភ្ញៀវទេសចរប្រកបដោយសុវត្ថិភាព ។

សូមបញ្ជាក់ដែរថា កោះតាឃួន ស្ថិតនៅក្នុងភូមិជាំធំ ឃុំកោះស្នែង ស្រុកបុរីអូរស្វាយសែនជ័យ ខេត្តស្ទឹងត្រែង មានចំងាយប្រហែល២២គីឡូម៉ែតពីក្រុងស្ទឹងត្រែង ស្របតាមផ្លូវជាតិលេខ៧ ឆ្លងកាត់តាមស្ពានសេកុង និងអាចទៅតាមផ្លូវជាតិលេខ៩ ដោយឆ្លងកាត់តាមស្ពានមេគង្គ ប្រហែល២៥គីឡូម៉ែត្រ ៕

អត្ថបទ៖ ស្រេង ចំរើន